ਜਨਤਕ ਥਾਵਾਂ ‘ਤੇ ਮਹਿਲਾਵਾਂ ਨਾਲ ਛੇੜਛਾੜ ਅਤੇ ਅਸ਼ਲੀਲਤਾ ਵਰਗੇ ਅਪਰਾਧਾਂ ਨੂੰ ਰੋਕਣ ਤੋਂ ਇਲਾਵਾ, ਦਿੱਲੀ ਪੁਲਿਸ ਨੇ ਬਦਮਾਸ਼ਾਂ ਦੀਆਂ ਗਤੀਵਿਧੀਆਂ ਨੂੰ ਕੰਟ੍ਰੋਲ ਕਰਨ ਲਈ ਹਰ ਜ਼ਿਲ੍ਹੇ ਵਿੱਚ ਵਿਸ਼ੇਸ਼ ਦਸਤੇ ਬਣਾਉਣੇ ਸ਼ੁਰੂ ਕਰ ਦਿੱਤੇ ਹਨ। ਦਿੱਲੀ ਪੁਲਿਸ ਦੇ ਇਹ “ਐਂਟੀ ਈਵ ਟੀਜਿੰਗ” ਜਾਂ “ਸ਼ਿਸ਼ਟਾਚਾਰ” ਦਸਤੇ ਸੰਵੇਦਨਸ਼ੀਲ ਅਤੇ ਭੀੜ-ਭੜੱਕੇ ਵਾਲੀਆਂ ਥਾਵਾਂ ‘ਤੇ ਨਜ਼ਰ ਰੱਖਣਗੇ, ਜਿੱਥੇ ਮਹਿਲਾਵਾਂ ਵਿਰੁੱਧ ਅਪਰਾਧ ਮਹਿਲਾਵਾਂ ਵਿੱਚ ਅਸੁਰੱਖਿਆ ਦੀ ਭਾਵਨਾ ਪੈਦਾ ਕਰਦੇ ਹਨ।
ਫ਼ੋਨ ਕਾਲ ਦੀ ਉਡੀਕ ਕਰਨ ਦੀ ਬਜਾਏ, ਇਹ ਦਸਤੇ ਸੜਕਾਂ, ਗਲੀਆਂ ਅਤੇ ਚੌਰਾਹਿਆਂ ‘ਤੇ ਮੌਜੂਦ ਰਹਿਣਗੇ ਅਤੇ ‘ਰੀਅਲ ਟਾਈਮ’ ਵਿੱਚ ਕਾਰਵਾਈ ਕਰਨਗੇ। ਉਨ੍ਹਾਂ ਦੀਆਂ ਜ਼ਿੰਮੇਵਾਰੀਆਂ ਵਿੱਚ ਅਪਰਾਧ ਨੂੰ ਰੋਕਣਾ, ਅਪਰਾਧੀਆਂ ਨੂੰ ਫੜਨਾ, ਮਾਮਲੇ ਦੀ ਜਾਂਚ ਕਰਨਾ ਅਤੇ ਉਨ੍ਹਾਂ ਨੂੰ ਸਖ਼ਤ ਸਜ਼ਾ ਦਵਾਉਣਾ ਸ਼ਾਮਲ ਹੈ।
ਦਿੱਲੀ ਪੁਲਿਸ ਕਮਿਸ਼ਨਰ ਸੰਜੇ ਅਰੋੜਾ ਨੇ 8 ਮਾਰਚ ਨੂੰ ਦਸਤਖ਼ਤ ਕੀਤੇ ਆਪਣੇ ਹੁਕਮ ਵਿੱਚ ਕਿਹਾ, “ਇਨ੍ਹਾਂ ਦਸਤਿਆਂ ਵਿੱਚ ਸਿਖਲਾਈ ਪ੍ਰਾਪਤ ਮੁਲਾਜ਼ਮ ਹੋਣਗੇ, ਜੋ ਅਸਲ ਸਮੇਂ ਦੇ ਆਧਾਰ ‘ਤੇ ਅਜਿਹੇ ਅਪਰਾਧਾਂ ਨੂੰ ਰੋਕਣਗੇ।” ਹਰੇਕ ਜ਼ਿਲ੍ਹੇ ਵਿੱਚ ਘੱਟੋ-ਘੱਟ ਦੋ ਉਤਪੀੜਨ ਵਿਰੋਧੀ ਦਸਤੇ ਹੋਣਗੇ, ਜਿਨ੍ਹਾਂ ਦੀ ਅਗਵਾਈ ਜ਼ਿਲ੍ਹੇ ਦੇ ਮਹਿਲਾ ਅਪਰਾਧ ਸੈੱਲ ਦੇ ਸਹਾਇਕ ਕਮਿਸ਼ਨਰ ਆਫ਼ ਪੁਲਿਸ (ਏਸੀਪੀ) ਕਰਨਗੇ। ਹਰੇਕ ਦਸਤੇ ਵਿੱਚ ਇੱਕ ਇੰਸਪੈਕਟਰ, ਇੱਕ ਸਬ-ਇੰਸਪੈਕਟਰ ਅਤੇ ਚਾਰ ਮਹਿਲਾ ਅਤੇ ਪੰਜ ਮਰਦ ਪੁਲਿਸ ਅਧਿਕਾਰੀ (ਸਹਾਇਕ ਸਬ-ਇੰਸਪੈਕਟਰ, ਹੈੱਡ ਕਾਂਸਟੇਬਲ ਅਤੇ ਕਾਂਸਟੇਬਲ) ਸ਼ਾਮਲ ਹੋਣਗੇ। ਵਿਸ਼ੇਸ਼ ਸਟਾਫ਼ ਜਾਂ ਐਂਟੀ-ਆਟੋ ਥੈਫਟ ਸਕੁਐਡ (ਏਏਟੀਐੱਸ) ਦੇ ਪੁਲਿਸ ਮੁਲਾਜ਼ਮ ਤਕਨੀਕੀ ਸਹਾਇਤਾ ਲਈ ਦਸਤੇ ਦੇ ਨਾਲ ਹੋਣਗੇ।
ਇਨ੍ਹਾਂ ਦਸਤੇ ਦਾ ਧਿਆਨ ਮੁੱਖ ਤੌਰ ‘ਤੇ “ਹੋਟ ਸਪੋਟਸ ਅਤੇ ਅਜਿਹੇ ਖੇਤਰਾਂ” ‘ਤੇ ਹੋਵੇਗਾ ਜਿੱਥੇ ਮਹਿਲਾਵਾਂ ਦੀ ਸੁਰੱਖਿਆ ਲਈ ਖ਼ਤਰਾ ਹੈ। ਹਰੇਕ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਆਫ਼ ਪੁਲਿਸ (ਡੀਸੀਪੀ) ਹੋਟ ਸਪੋਟਸ ਦੀ ਪਛਾਣ ਕਰਨਗੇ ਅਤੇ ਉਨ੍ਹਾਂ ਦੀ ਸੂਚੀ ਤਿਆਰ ਕਰਨਗੇ। ਪਰ ਸਕੁਐਡਾਂ ਨੂੰ “ਲੋਕਾਂ ‘ਤੇ ਨਿੱਜੀ ਜਾਂ ਸੱਭਿਆਚਾਰਕ ਨੈਤਿਕਤਾ ਥੋਪਣ ਦੀ ਬਜਾਏ ਕਾਨੂੰਨ ਨੂੰ ਲਾਗੂ ਕਰਨ ‘ਤੇ ਧਿਆਨ ਕੇਂਦਰਿਤ ਕਰਨ” ਲਈ ਕਿਹਾ ਗਿਆ ਹੈ।
