ਦਿੱਲੀ ਪੁਲਿਸ ਦੇ ਸਹਾਇਕ ਥਾਣੇਦਾਰ ਸ਼ੰਭੂ ਦਿਆਲ ਨੇ ਆਖਰਕਾਰ ਆਪਣੀ ਜਾਨ ਦੇ ਦਿੱਤੀ। ਬੁੱਧਵਾਰ ਦੁਪਹਿਰ ਉਨ੍ਹਾਂ ਨੂੰ ਜ਼ਖ਼ਮੀ ਹਾਲਤ ‘ਚ ਬੀ.ਐੱਲ.ਕਪੂਰ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ, ਜਿੱਥੇ ਉਨ੍ਹਾਂ ਨੇ ਅੱਜ ਆਖਰੀ ਸਾਹ ਲਿਆ। ਇੱਕ ਬਦਮਾਸ਼ ਜਿਸ ਨੇ ਮਹਿਲਾ ਦਾ ਫੋਨ ਖੋਹ ਲਿਆ ਸੀ ਅਤੇ ਭੱਜ ਗਿਆ ਸੀ ਅਤੇ ਸ਼ੰਭੂਦਿਆਲ ਉਸ ਨੂੰ ਫੜ ਕੇ ਥਾਣੇ ਲਿਆ ਰਹੇ ਸਨ। ਬਦਮਾਸ਼ ਦਾ ਨਾਂਅ ਅਨੀਸ਼ ਰਾਜ ਹੈ, ਜਿਸ ਦੀ ਉਮਰ ਕਰੀਬ 24 ਸਾਲ ਹੈ।
ਆਪਣੀ ਡਿਊਟੀ ਲਈ ਕੁਰਬਾਨੀ ਦੇਣ ਵਾਲੇ ASI ਸ਼ੰਭੂਦਿਆਲ ਦਾ ਅੰਤਿਮ ਸਸਕਾਰ ਰਾਜਸਥਾਨ ਦੇ ਨੀਮ ਕਾ ਥਾਣਾ ਦੀ ਤਹਿਸੀਲ ਦੇ ਪਿੰਡ ਗਵਲੀ ਬਿਹਾਰੀਪੁਰ ਵਿੱਚ ਕੀਤਾ ਜਾਵੇਗਾ। ਸ਼ੰਭੂਦਿਆਲ ਸੀਕਰ ਦਾ ਰਹਿਣ ਵਾਲਾ ਸੀ।
ਇਹ ਪੂਰੀ ਵਾਰਦਾਤ ਬੁੱਧਵਾਰ ਨੂੰ ਉਦੋਂ ਸ਼ੁਰੂ ਹੋਈ ਜਦੋਂ ਪੱਛਮੀ ਦਿੱਲੀ ਦੇ ਮਾਇਆਪੁਰੀ ਦੀ ਰਹਿਣ ਵਾਲੀ ਵੰਦਨਾ ਨਾਂਅ ਦੀ ਮਹਿਲਾ ਸ਼ਾਮ 4 ਵਜੇ ਪੁਲਿਸ ਤੋਂ ਮਦਦ ਲੈਣ ਲਈ ਮਾਇਆਪੁਰੀ ਥਾਣੇ ਪਹੁੰਚੀ। ਮਹਿਲਾ ਨੇ ਪੁਲਿਸ ਨੂੰ ਦੱਸਿਆ ਕਿ ਇੱਕ ਬਦਮਾਸ਼ ਨੇ ਉਸ ਦਾ ਮੋਬਾਇਲ ਫੋਨ ਖੋਹ ਲਿਆ ਅਤੇ ਚਾਕੂ ਨਾਲ ਉਸ ਨੂੰ ਜਾਨੋਂ ਮਾਰਨ ਦੀ ਧਮਕੀ ਵੀ ਦਿੱਤੀ।
ਮਹਿਲਾ ਦੀ ਸ਼ਿਕਾਇਤ ’ਤੇ ਏਐੱਸਆਈ ਸ਼ੰਭੂਦਿਆਲ ਉਸ ਨੂੰ ਉਸ ਥਾਂ ’ਤੇ ਲੈ ਗਿਆ ਜਿੱਥੇ ਅਨੀਸ਼ ਮੌਜੂਦ ਸੀ। ਉਹ ਝੁੱਗੀ ਵਿੱਚ ਰਹਿੰਦਾ ਸੀ। ਜਦੋਂ ਏਐੱਸਆਈ ਸ਼ੰਭੂਦਿਆਲ ਅਨੀਸ਼ ਨੂੰ ਫੜ ਕੇ ਥਾਣੇ ਲੈ ਜਾਣ ਲੱਗੇ ਤਾਂ ਅਨੀਸ਼ ਨੇ ਅਚਾਨਕ ਆਪਣੀ ਕਮੀਜ਼ ਦੇ ਅੰਦਰ ਛਿਪਾਇਆ ਚਾਕੂ ਕੱਢ ਲਿਆ ਅਤੇ ਸ਼ੰਭੂਦਿਆਲ ‘ਤੇ ਕਈ ਵਾਰ ਕੀਤੇ। ਉਸ ਨੇ ਸ਼ੰਭੂਦਿਆਲ ਦੇ ਪੇਟ, ਛਾਤੀ ਅਤੇ ਗਰਦਨ ‘ਤੇ ਹਮਲਾ ਕੀਤਾ। ਪਿੱਠ ‘ਤੇ ਵੀ ਜ਼ਖ਼ਮ ਸਨ। ਅਨੀਸ਼ ਨੇ ਉਥੋਂ ਭੱਜਣ ਦੀ ਕੋਸ਼ਿਸ਼ ਕੀਤੀ ਪਰ ਇਸੇ ਦੌਰਾਨ ਹੋਰ ਪੁਲਿਸ ਮੁਲਾਜ਼ਮ ਉੱਥੇ ਪਹੁੰਚ ਗਏ। ਅਨੀਸ਼ ਨੂੰ ਥਾਣੇ ਲੈ ਜਾਇਆ ਗਿਆ ਅਤੇ ਜ਼ਖ਼ਮੀ ਸ਼ੰਭੂਦਿਆਲ ਨੂੰ ਕਰੋਲ ਬਾਗ ਨੇੜੇ ਬੀਐੱਲ ਕਪੂਰ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ। ਉੱਥੇ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਸੀ ਪਰ ਉਨ੍ਹਾਂ ਨੂੰ ਬਚਾਇਆ ਨਹੀਂ ਜਾ ਸਕਿਆ।
