ਕੇਂਦਰੀ ਗ੍ਰਹਿ ਅਤੇ ਸਹਿਕਾਰਤਾ ਮੰਤਰੀ ਅਮਿਤ ਸ਼ਾਹ ਨੇ ਅੱਜ ਅਸਾਮ ਦੇ ਡੇਰਗਾਓਂ ਵਿਖੇ ਲਚਿਤ ਬੋਰਫੁਕਨ ਪੁਲਿਸ ਅਕੈਡਮੀ ਦੇ ਪਹਿਲੇ ਪੜਾਅ ਦਾ ਉਦਘਾਟਨ ਕੀਤਾ, ਅਤੇ ਦਾਅਵਾ ਕੀਤਾ ਕਿ ਇਹ ਭਾਰਤ ਦੀ ਸਭ ਤੋਂ ਵਧੀਆ ਪੁਲਿਸ ਸਿਖਲਾਈ ਅਕੈਡਮੀ ਬਣ ਜਾਵੇਗੀ। ਉਦਘਾਟਨ ਮੌਕੇ ਅਸਾਮ ਦੇ ਮੁੱਖ ਮੰਤਰੀ ਡਾ. ਹਿਮੰਤ ਬਿਸਵਾ ਸਰਮਾ ਅਤੇ ਕੇਂਦਰੀ ਮੰਤਰੀ ਸਰਬਾਨੰਦ ਸੋਨੋਵਾਲ ਮੌਜੂਦ ਸਨ।
ਆਪਣੇ ਸੰਬੋਧਨ ਵਿੱਚ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਅਗਲੇ 5 ਸਾਲਾਂ ਵਿੱਚ ਲਚਿਤ ਬੋਰਫੁਕਨ ਪੁਲਿਸ ਅਕੈਡਮੀ ਦੇਸ਼ ਭਰ ਦੀਆਂ ਸਾਰੀਆਂ ਪੁਲਿਸ ਅਕੈਡਮੀਆਂ ਵਿੱਚੋਂ ਪਹਿਲੇ ਸਥਾਨ ‘ਤੇ ਆਵੇਗੀ। ਉਨ੍ਹਾਂ ਨੇ ਅਸਾਮ ਦੇ ਬਹਾਦਰ ਯੋਧੇ ਲਚਿਤ ਬੋਰਫੁਕਨ ਦੇ ਇਤਿਹਾਸ ਦਾ ਜ਼ਿਕਰ ਕੀਤਾ ਜਿਨ੍ਹਾਂ ਨੇ ਅਸਾਮ ਨੂੰ ਮੁਗਲਾਂ ਵਿਰੁੱਧ ਜਿੱਤ ਦਿਵਾਈ।
ਸ਼੍ਰੀ ਸ਼ਾਹ ਨੇ ਕਿਹਾ ਕਿ ਅੱਜ ਲਚਿਤ ਬੋਰਫੁਕਨ ਪੁਲਿਸ ਅਕੈਡਮੀ ਦੇ ਰੂਪ ਵਿੱਚ ਜੋ ਬੀਜ ਬੀਜਿਆ ਗਿਆ ਹੈ, ਉਹ ਇੱਕ ਦਿਨ ਇੱਕ ਵੱਡੇ ਬੋਹੜ ਦੇ ਰੁੱਖ ਵਿੱਚ ਉੱਗੇਗਾ ਜੋ ਪੂਰੇ ਦੇਸ਼ ਦੀ ਪੁਲਿਸ ਨੂੰ ਛਾਂ ਪ੍ਰਦਾਨ ਕਰੇਗਾ। ਗ੍ਰਹਿ ਮੰਤਰੀ ਨੇ ਕਿਹਾ ਕਿ ਇਹ ਅਕੈਡਮੀ ਨਾ ਸਿਰਫ਼ ਅਸਾਮ ਸਗੋਂ ਪੂਰੇ ਉੱਤਰ-ਪੂਰਬ ਦੀ ਪੁਲਿਸਿੰਗ ਲਈ ਕਾਸ਼ੀ ਵਾਂਗ ਇੱਕ ਤੀਰਥ ਸਥਾਨ ਬਣ ਜਾਵੇਗੀ ਅਤੇ ਇੱਥੋਂ ਸ਼ਾਂਤੀ ਦੀ ਇੱਕ ਨਵੀਂ ਸ਼ੁਰੂਆਤ ਹੋਵੇਗੀ।
ਲਚਿਤ ਬੋਰਫੁਕਨ ਅਕੈਡਮੀ ਦਾ ਪਹਿਲਾ ਪੜਾਅ 167 ਕਰੋੜ ਰੁਪਏ ਦੀ ਲਾਗਤ ਨਾਲ ਪੂਰਾ ਹੋ ਗਿਆ ਹੈ ਅਤੇ ਇਸਦੇ ਤਿੰਨ ਪੜਾਵਾਂ ‘ਤੇ ਕੁੱਲ 1,050 ਕਰੋੜ ਰੁਪਏ ਖਰਚ ਕੀਤੇ ਜਾਣਗੇ। ਸ਼੍ਰੀ ਸ਼ਾਹ ਨੇ ਇੱਥੇ ਉਪਲਬਧ ਆਧੁਨਿਕ ਸਹੂਲਤਾਂ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਪਹਿਲਾਂ ਅਸਾਮ ਪੁਲਿਸ ਸਿਖਲਾਈ ਲਈ ਦੂਜੇ ਰਾਜਾਂ ਵਿੱਚ ਜਾਂਦੀ ਸੀ, ਪਰ ਪਿਛਲੇ 8 ਸਾਲਾਂ ਵਿੱਚ ਰਾਜ ਦੇ ਸ਼ਾਸਨ ਵਿੱਚ ਅਜਿਹਾ ਬਦਲਾਅ ਆਇਆ ਹੈ ਕਿ ਹੁਣ ਗੋਆ ਅਤੇ ਮਣੀਪੁਰ ਦੇ 2 ਹਜ਼ਾਰ ਪੁਲਿਸ ਮੁਲਾਜ਼ਮ ਇਸ ਪੁਲਿਸ ਅਕੈਡਮੀ ਵਿੱਚ ਸਿਖਲਾਈ ਲੈ ਚੁੱਕੇ ਹਨ।
ਸਰਕਾਰ ਨੇ ਅਸਾਮ ਵਿੱਚ ਅਪਰਾਧ ਸਜ਼ਾ ਅਨੁਪਾਤ 5 ਫੀਸਦੀ ਤੋਂ ਵਧਾ ਕੇ 25 ਫੀਸਦੀ ਕਰ ਦਿੱਤਾ ਹੈ। ਅਮਿਤ ਸ਼ਾਹ ਨੇ ਕਿਹਾ ਕਿ ਪਹਿਲਾਂ ਅਸਾਮ ਵਿੱਚ ਪੁਲਿਸ ਅੱਤਵਾਦ ਵਿਰੁੱਧ ਲੜਨ ਤੱਕ ਸੀਮਤ ਸੀ, ਅੱਜ ਇਹ ਨਾਗਰਿਕਾਂ ਦੇ ਅਧਿਕਾਰਾਂ ਦੀ ਰੱਖਿਆ ਲਈ ਲਿਆਂਦੇ ਗਏ ਤਿੰਨ ਨਵੇਂ ਅਪਰਾਧਿਕ ਕਾਨੂੰਨਾਂ ਨੂੰ ਸਫਲਤਾਪੂਰਵਕ ਲਾਗੂ ਕਰਨ ਲਈ ਕੰਮ ਕਰ ਰਹੀ ਹੈ। ਅਸਾਮ ਵਿੱਚ ਅਪਰਾਧ ਸਜ਼ਾ ਅਨੁਪਾਤ 5 ਪ੍ਰਤੀਸ਼ਤ ਤੋਂ ਵਧ ਕੇ 25 ਫੀਸਦੀ ਹੋ ਗਿਆ ਹੈ।
