ਭਾਰਤ ਦੀ ਰਾਜਧਾਨੀ ਦਿੱਲੀ ਸਥਿਤ ਨੈਸ਼ਨਲ ਵਾਰ ਮੈਮੋਰੀਅਲ ਤੋਂ ਫੌਜ ਦੀਆਂ 25 ਔਰਤਾਂ ਦਾ ਇੱਕ ਦਲ ਮੋਟਰਸਾਈਕਲ ‘ਤੇ ਕਾਰਗਿਲ ਲਈ ਰਵਾਨਾ ਹੋਇਆ ਹੈ। ਇਹ ਸਮਾਗਮ ‘ਕਾਰਗਿਲ ਵਿਜੇ ਦਿਵਸ 2023’ ਦੇ ਮੌਕੇ ਅਤੇ ਮਹਿਲਾ ਸਸ਼ਕਤੀਕਰਨ ਦੇ ਰੂਪ ਵਜੋਂ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਇਹ ਟੀਮ ਲਗਭਗ 1000 ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਕੇ ਦਰਾਸ ਪਹੁੰਚੇਗੀ ਜਿੱਥੇ 1999 ਵਿੱਚ ਪਾਕਿਸਤਾਨ ਨਾਲ ਲੜੇ ਗਏ ਯੁੱਧ ਦੀ ਯਾਦਗਾਰ ਸਥਾਪਿਤ ਹੈ। ਫੌਜ ਮੁਖੀ ਜਨਰਲ ਮਨੋਜ ਪਾਂਡੇ ਨੇ ਮਹਿਲਾ ਮੋਟਰਸਾਈਕਲ ਦਸਤੇ ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ।
ਫੌਜ ਦੇ ਬੁਲਾਰੇ ਨੇ ਦੱਸਿਆ ਕਿ ਇਸ ਟੀਮ ਵਿੱਚ ਫੌਜ ਦੇ ਤਿੰਨੋਂ ਵਿੰਗਾਂ ਵਿੱਚ ਸੇਵਾਵਾਂ ਨਿਭਾ ਰਹੀਆਂ ਮਹਿਲਾ ਸਿਪਾਹੀਆਂ ਹਨ, ਫੌਜੀਆਂ ਦੀਆਂ ਪਤਨੀਆਂ ਅਤੇ ਉਹ ਬਹਾਦਰ ਔਰਤਾਂ ਵੀ ਹਨ, ਜਿਨ੍ਹਾਂ ਦੇ ਪਤੀ ਫੌਜ ਵਿੱਚ ਸੇਵਾ ਕਰਦੇ ਹੋਏ ਆਪਣੀ ਜਾਨ ਗੁਆ ਬੈਠੇ ਹਨ। ਫੌਜ ਮੁਖੀ ਨੇ ਦਿੱਲੀ ਤੋਂ ਰਵਾਨਾ ਹੋਣ ਦੇ ਪ੍ਰੋਗਰਾਮ ਦੌਰਾਨ ਉਨ੍ਹਾਂ ਨਾਲ ਮੁਲਾਕਾਤ ਕੀਤੀ। ਇਸ ਸਮਾਗਮ ਨੂੰ ‘ਮਹਿਲਾ ਸਸ਼ਕਤੀਕਰਨ ਵੂਮੈਨ ਮੋਟਰ ਸਾਈਕਲ ਰੈਲੀ’ ਦਾ ਨਾਂ ਦਿੱਤਾ ਗਿਆ ਹੈ। ਫੌਜ ਮੁਖੀ ਦੇ ਨਾਲ ਉਨ੍ਹਾਂ ਦੀ ਪਤਨੀ ਵੀ ਸੀ। ਇਸ ਮੌਕੇ ਫ਼ੌਜ ਦੇ ਹੋਰ ਸੀਨੀਅਰ ਅਧਿਕਾਰੀ ਆਪਣੀਆਂ ਪਤਨੀਆਂ ਸਮੇਤ ਹਾਜ਼ਰ ਸਨ। ਮੋਟਰ ਸਾਈਕਲ ਟੀਮ ਦੇ ਮੈਂਬਰਾਂ ਨੂੰ ਵਿਦਾਇਗੀ ਦੇਣ ਲਈ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਵੀ ਪਹੁੰਚੇ ਅਤੇ ਉਨ੍ਹਾਂ ਨੂੰ ਸਫ਼ਲ ਯਾਤਰਾ ਦੀ ਕਾਮਨਾ ਕੀਤੀ।
ਕਾਰਗਿਲ ਜੰਗ:
ਇਹ ਮੋਟਰਸਾਈਕਲ ਸਵਾਰ ਔਰਤਾਂ ਇੱਥੇ ਦਰਾਸ ਸਥਿਤ ‘ਕਾਰਗਿਲ ਵਾਰ ਮੈਮੋਰੀਅਲ’ ਵਿਖੇ ਪਾਕਿਸਤਾਨ ਨਾਲ 1999 ਦੀ ਜੰਗ ਵਿੱਚ ਸ਼ਹੀਦ ਹੋਏ ਜਵਾਨਾਂ ਨੂੰ ਸ਼ਰਧਾਂਜਲੀ ਭੇਟ ਕਰਨਗੀਆਂ। ਕਾਰਗਿਲ ਯੁੱਧ ਵਿਚ ਭਾਰਤ ਨੇ ਆਪਣੇ 527 ਸੈਨਿਕ ਗੁਆ ਦਿੱਤੇ ਸਨ। ਇਸ ਜੰਗ ਵਿੱਚ ਭਾਰਤ ਦੇ 1363 ਸੈਨਿਕ ਜ਼ਖ਼ਮੀ ਹੋਏ ਸਨ। ਪਾਕਿਸਤਾਨ ਨੇ ਅਧਿਕਾਰਤ ਤੌਰ ‘ਤੇ ਇਸ ਜੰਗ ‘ਚ ਉਸ ਦੇ 453 ਸੈਨਿਕਾਂ ਦੇ ਮਾਰੇ ਜਾਣ ਦੀ ਪੁਸ਼ਟੀ ਕੀਤੀ ਹੈ ਪਰ ਇਕ ਅਮਰੀਕੀ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਕਾਰਗਿਲ ਯੁੱਧ ‘ਚ ਪਾਕਿਸਤਾਨ ਦੇ ਕਰੀਬ 700 ਸੈਨਿਕ ਮਾਰੇ ਗਏ ਸਨ। ਇਹ ਜੰਗ ਮਈ 1999 ਵਿੱਚ ਸ਼ੁਰੂ ਹੋਈ ਸੀ ਅਤੇ ਇਸਦੀ ਫੈਸਲਾਕੁੰਨ ਲੜਾਈ ਜੁਲਾਈ ਦੇ ਆਖਰੀ ਹਫ਼ਤੇ ਲੜੀ ਗਈ ਸੀ।
ਖੇਤਰ ਦੀਆਂ ਚੁਣੌਤੀਆਂ:
ਦਰਾਸ ਕੇਂਦਰ ਸ਼ਾਸਤ ਪ੍ਰਦੇਸ਼ ਲੱਦਾਖ ਦੇ ਕਾਰਗਿਲ ਜ਼ਿਲ੍ਹੇ ਦਾ ਹਿੱਸਾ ਹੈ ਅਤੇ ਦੁਨੀਆ ਦੇ ਸਭ ਤੋਂ ਠੰਡੇ ਅਤੇ ਸਭ ਤੋਂ ਮੁਸ਼ਕਲ ਭੂਗੋਲਿਕ ਸਥਾਨਾਂ ਵਿੱਚੋਂ ਇੱਕ ਹੈ। ਇੱਥੇ ਲੜਨਾ ਬਹੁਤ ਵੱਡੀ ਗੱਲ ਹੈ, ਸਾਲ ਦੇ ਸਾਰੇ ਬਾਰਾਂ ਮਹੀਨੇ ਸਾਦਾ ਜੀਵਨ ਬਤੀਤ ਕਰਨਾ ਕਿਸੇ ਪ੍ਰਾਪਤੀ ਤੋਂ ਘੱਟ ਨਹੀਂ ਹੈ। ਸੜਕ ਦੁਆਰਾ ਭਾਰਤ ਦੇ ਇਸ ਹਿੱਸੇ ਤੱਕ ਪਹੁੰਚਣ ਲਈ, ਸ਼੍ਰੀਨਗਰ ਤੋਂ ਹੋ ਕੇ ਜਾਂਦਾ ਹੈ ਪਰ ਰਸਤੇ ਵਿੱਚ ਤੁਹਾਨੂੰ ਖਤਰਨਾਕ ਜ਼ੋਜ਼ਿਲਾ ਦੱਰਾ ਪਾਰ ਕਰਨਾ ਪੈਂਦਾ ਹੈ। ਸਰਦੀਆਂ ਵਿੱਚ ਭਾਰੀ ਬਰਫ਼ਬਾਰੀ ਕਾਰਨ ਇਹ ਸੜਕ ਮਾਰਚ-ਅਪ੍ਰੈਲ ਤੱਕ ਬੰਦ ਰਹਿੰਦੀ ਹੈ। ਹੁਣ ਇੱਥੇ ਇੱਕ ਸੁਰੰਗ ਬਣਾਈ ਜਾ ਰਹੀ ਹੈ, ਜਿਸ ਦੇ ਪੂਰਾ ਹੋਣ ‘ਤੇ ਕਸ਼ਮੀਰ ਅਤੇ ਲੱਦਾਖ ਵਿਚਕਾਰ 12 ਮਹੀਨਿਆਂ ਤੱਕ ਜ਼ਮੀਨੀ ਸੰਪਰਕ ਰਹੇਗਾ।
